Дзень роднай мовы

Як сонца маё беларускае

Да Міжнароднага дня роднай мовы ў гімназіі праводзіліся разнастайныя мерапрыемствы: віктарыны, конкурсы чытальнікаў, літаратурныя гасцёўні, вусныя часопісы, віктарыны. Для вучняў 10 “А” класа Смаргонскай гімназіі найбольш запамінальнай стала сустрэча з паэтэсай Алай Клемянок.

Пачалося мерапрыемства на ўзвышанай лірычнай ноце. Анастасія Бярозка, Арцём Найдзіч, Дар’я Гакуць чыталі вершы паэткі. Затым слова далі Але Леанідаўне. Яна нагадала прысутным пра сёлетні 125-гадовы юбілей Максіма Багдановіча, які будзе адзначацца 9 снежня. Наш знакаміты паэт шанаваў беларускае слова, любіў сваю Радзіму, яго кароткае жыццё з’яўляецца подзвігам, прыкладам служэння народу. Узгадваюцца ў гэтай сувязі словы Уладзіміра Караткевіча: “Бо як ёсць у народа такія – не загіне давеку народ”.

Госця чытала свае вершы. Кранулі прысутных арыгінальнасцю і дасканаласцю трыялеты. Вучні запомнілі парады паэткі: часцей карыстацца беларускай мовай у штодзённым жыцці, радавацца кожнаму дню свайго жыцця. Гэтаму яна навучыла сваіх сыноў, пра якіх гаварыла з любоўю і цеплынёй.

Мы ўсе пераканаліся, як жывое слова паэта можа глыбока пранікаць у душу, закранаць яе запаветныя куточкі, абуджаць высокія пачуцці і, нарэшце, аказваць вялікі ўплыў на фарміраванне светапогляду і перакананняў моладзі. Словы падзякі мы адрасуем Але Клемянок, якая шчырым беларускім словам далучае да чыстых втокаў народнай маралі, культуры, духоўнасці.

Данута СКРОБАВА,

настаўніца беларускай мовы і літаратуры

гімназіі г.Смаргонь.