НЕАБСЯЖНАСЦЬ

Я бачыў бязмежнасць саваны,

я бачыў тайговы абшар,

глядзеў часта зачараваны

я ўніз з самалёта з-за хмар.

О, колькі ў свеце прастораў,

дзе зроку няма перашкод,

дзе вецер, што крочыць да мораў,

не раз сустракае ўсход!

Такі неабсяжны і дзіўны

сусвет, як і міласны кут,

бо сэрцу, мо гэта й наіўна,

ёсць кропля, як велічны цуд!

Бо кожны нідзе і ніколі

не знойдзе з дзіцячых гадкоў

шырэй неабсяжнага поля

за домам радзінным бацькоў.